تھاں |

تھاں

میری بیکر ایڈی ولوں منسوب کیتا ہوئیامضمون



سبق دی آڈیو لئی ایتھے کلک کرو



جیس تھاں نوں اسی لبھدے آں اوہ ہی تھاں ساہنوں لبھ رہئی اے: جیس تھاں دی ساہنوں لوڑ اے اوہسے تھاں نوں ساڈی وی لوڑ اے۔ الٰہی اصول سانجھی بھلیائی لئی لوڑ تے فراہمی نوں اکٹھیاں دیندا اے۔ رب بوہت سلیقے نال، عقل دے نال تے پیار دے نال خیال (انسان) تے اوہدے کاج (کم) دونواں دے اکٹھ نوں کنٹرول کردا ، ہدایت دیندا، بچا کے رکھدا، خوشحال کردا تے برکت دیندا اے۔

تہاڈے تھاں یا تہاڈے کم نوں بناؤن چہ ویلہ نہیں لگدا، کیوں جے اوہدے تھاں توں بغیر کسی وی خیال دا ہونا ناممکن جیہا لگدا اے، تے تھاں بالکل اوسے طراں ای ترقی والی ہندی اے جیس طراں اوہ نظریہ ہندا اے جیہڑا ایہنوں پورا کردا اے۔ تھاں نوں نظریے دیاں ساریاں لوڑاں پوریاں کرنیاں چاہیدیاں نیں جے تے ایہہ اصول دے مطابق مہیا کیتا گیا اے تے۔

تہانوں ایس گل دا دھیان رکھن دی لوڑ اے پئی تہاڈی سیان بے حد بھلیائی لئی پوری طراں تیار، کھلی، پاک، اچی، مزے والی تے متوقع ہووے تاں جو رب دے نظریے لئی اوہدی مرضی نوں پوری طراں ظاہر کرن لئی کوئی حدبندی رکاوٹ نہ بنے، تے تہانوں چنگی طراں پتا اے پئی رب دے نظریے لئی اوہدی مرضی کاملیت اے ، ایہدے توں ودھ کجھ وی نئیں۔

ساہنوں جو بدلن دی لوڑ اے اوہ ہم آہنگی، قدرت دی حکومت بارے ساڈی سیان وچ اختلافی احساس اے۔

کون آکھدا اے کہ ’’میں ایتھے اپنا کم پورا کر لیا اے تے ہن کوئی ہور تھاں لبھنی چاہیدی اے؟‘‘ رب کلا ای خاکہ بناؤندا تے ہدایت دیندا اے۔ تسی نئیں جان دے پئی ایتھے رکنا ٹھیک اے یا نئیں، سوائے ایہدے پئی تہاڈے ساہمنے ویلے کویلے دے مرحلے رکھے جان۔ بھانویں ساڈیاں خواہشاں ترقی دے نال سانجھ رکھدیاں نیں، فیر وی ساہنوں کوئی چنگا قدم چکن توں پہلاں ساری انسانی مرضی تے منصوبے نوں نیواں کر دینا چاہیدا اے۔

قدرت دی اکھ وچ کوئی انسانی مرضی تے منصوبے، مظبوط منصوبے نئیں؛ ایس لئی، تہاڈے کول ایس جھوٹ نوں ظاہر کرن دی کوئی طاقت یا کوئی وجہ نئیں اے۔ بس صبر تے وفاداری اے کیوں کے رب ای سب کج دا مالک تے ہر تھاں تے موجود رہن والا اے۔ سارا کجھ چپ، پیار تے ہم آہنگی اے۔ رب بالکل اوتھے ای اے جتھے تسی رہندے او۔ رک جاؤ تے اپنے نظریے نوں اوچا رکھو۔ ایہناں نوں ظاہر کرن لئی کوئی ظلم، کوئی بے رحمی، کوئی ورغلان والا، شہوت، لالچ، بے انصافی تے آپ کیتی نیکی کتے وی نئیں اے؛ تہاڈے ماحول وچ ایہناں دا کوئی اظہار نئیں ملدا۔ تہانوں پریشان کرن، زبردستی کرن تے دباؤن دا کوئی دعویٰ نئیں اے۔ ’’رب دی ہستی بے پناہ ، آزادی ، ہم آہنگی تے بوہت خوشی ورگی اے‘‘ (سائنس تے صحت) ولوں، تے تسی رب دا پرچھانواں بن دے او۔ ایس لئی سانجھے کم دی سیان لئی کم کروتے شخصی احساس نوں واضح کرو، بھانویں چنگا یا بھیڑ بندہ، تے ایہہ جان لو پئی تسی مسیح خداوند دی سیوا کردے او، تے ایہہ وی جان لو پئی رب دی دتی ہوئی ہدایت، تے رب دا محفوظ کیتاہوئیا، تے رب دا مقرر کیتا ہوئیا کم کوئی نئیں روک سکدا، ناں ٹال سکدا تے ناں اوہدے اگے روڑے اٹکا سکدا اے۔

تسی ماحول نوں نئیں بدل سکدے۔ اسی بس اپنے ماحول دے احساس نوں بدل سکدے آں، تے وکھریاں وکھریاں شیواں دے بارے ساڈے وچاراں نوں اوچا کیتئیوں بغیر اسی ایہہ کسے طراں وی نئیں کر سکدے۔ بس رب ای کلا ماحول اے۔ ساہنوں ساڈے نظریے نوں واضح کرنا پئے گا، ڈر، بے صبری تے اپنے نال دے بندیاں بارے غلط فہمیاں دے گند نوں صاف کرنا پئے گا، تے ایہہ جاننا پئے گا پئی کلی سیان ساریاں وچ چمکدی تے ساریاں اتے حاکم ہندی اے۔تہانوں منصوبے بناؤن، کیویں یا کدوں یا کتھے سوچن دی لوڑ نئیں؛ ایہہ رب دا کم اے۔ تہاڈا کم ایہہ اے پئی جدوں اوہدا بلاوہ آؤندا اے تے تسی توجہ نال ایہدا پرچھانواں بنو، ایہنوں سنو تے ایہدے اتے عمل کرو۔ قدرت دی مرضی ساہنوں ہر ویلے تے ہمیش تیکربلاؤندی اے تے ساہنوں باپ دی مرضی دس دی اے، پر اسی ایہہ جانن دی بجائے پئی ایہہ تاں پہلاں ای پوری کر دتی گئی اے ساریاں کماں نوں اپنے طریقے نال پورا کرن وچ ایہنے مگن ہو جانے آں پئی ادھے توں بوہتا ویلہ اسی ایہہ سنن دی کوشش وی نئیں کر دے پئی رب کیہ آکھ دا اے۔ رب دی مرضی بوہت سیان دے نال ساڈے ڈر والے احساس نوں مکاندیاں ہوئے ظاہر ہندی اے تے سیان دے نال ای ساڈی لوڑ نوں پورا کر دی اے۔

تہانوں سچی مچی لوڑ نئیں اے، کیوں جے تسی رب دی نظر وچ پہلاں ای پورے او۔ رب سوچ رہیا اے ، تے تسی رب دی سوچ دا پرچھانواں بن دے او۔ رب کم کر رہیا اے تے کوئی ہور ایہہ کم نئیں کر سکدا۔ رب خاکہ بناؤندا تے ہدایت دیندا اے تے کوئی اوہدا ہتھ نئیں روک سکدا تے اوہنوں کوئی ایہہ نئیں کہہ سکدا پئی، ’’توں کیہ کر رہیا ایں؟‘‘ رب تہاڈے کم بارے تہانوں دسے گا پئی تہانوں کیہ کرنا چاہیدا اے۔ اوہ ہر قدم تہانوں دسے گا ، ایس لئی پریشان یا مایوس یا بے صبرے نہ بنو۔ اوہنے تہاڈے لئی حدوں بغیر بھلیائی اکٹھی کر کے رکھی اے۔ بس ایہہ جانن دی کوشش کرو پئی تسی ایہدے لئی راضی او۔ ساہنوں ایہہ جانن دی لوڑ اے پئی بد چلنی چرچ، خانوادیاں تے یارِیاں نوں مکان دی حمایت نئیں کرسکدی۔ ساہنوں ایہہ جانن دی لوڑ اے پئی قدرت دی سوچ تعمیر دا کم کر دی اے تے اکٹھیاں رکھدی اے تے بھلیائی پیدا کردی اے۔

موافقت قدرتی تے کامل قانون ازلوں موجود توجہ دے قانون راہیں کم کردیاں ہوئے تہاڈے لئی اوہ سارا کجھ مہیا کر رہیا اے جو تہاڈا ای اے۔

ہر روز اک تو ودھ واری اپنے آپ نوں ایہہ احساس دلاؤ پئی پیلیاں واڈھی لئی پک گئیاں نیں پئی، ’’قدرت دے پیار نے انسان دی لوڑ نوں ہمیش تیکر پورا کیتا اے تے کردا رہئے گا۔‘‘ (سائنس تے صحت) ولوں۔ کم دی لوڑ دے نال نال دوجیاں لوڑاں وی پوریاں کیتیاں گئیاں نیں۔ اوہ سیان کم وچ لگی ہوئی اے تے تسی اوہدے کم دا پرچھانواں بن دے او؛ پئی ساریاں لئی بوہت سارا کم موجود اے؛ تے ایہہ پئی جیہڑا تہاڈا اے اوہ تہانوں ای ملے گاتے کوئی دوجا ایہہ نئیں کر سکدا تے ایہہ سدھا تہاڈے کول ای آؤندااے تے اوہدی فراہمی چوکھی اے۔ تے اوہدے ہوون دا احساس ہر ویلے رکھو۔ اک لمحے لئی وی اپنے آپ نوں کسے شے دی کمی دا احساس نہ ہون دو۔ ہر طراں دی بیماری تے مصیبتاں نسلاں تے درجیاں دیاں خرابیاں نیں۔ رب چوکھا اے تے اور اوہ ساہنوں چوکھا ای دیندا اے۔ ایہہ سب کجھ ساڈیاں لوڑاں لئی روشنی، پیار، سچیائی تے سیان دے چوکھے ہوون توں ظاہر ہوندا اے۔ اپنے مقصد اتے قائم رہو، تے اپنے کم ول دھیان دو تے مسیحی سائنس بارے اپنی عقل اتے بھروسہ رکھو۔ 

تھاں: ساریاں توں پہلاں ایس قانون نوں جاننا چاہیدا اے تھاں دی تعیناتی کوئی دوجا نئیں کر دا۔ پولوس رسول آکھدا اے، ’’کیوں کہ اسی اوہدے وچ ای جیندے تے ٹردے پھردے تے موجود آں۔‘‘ ایس گل دی سمجھ پئی انسان، رب دا نظریہ، پہلاں ای اپنی صحیح تھاں تے اے ، شفا دا کم کر دا اے، کیوں کے ایہہ تھاں ہن اوس سیان وچ اے ایس لئی ایہدیاں لوڑاں قدرتی سیان،یعنی پیار، والوں پوریاں کیتیاں جاندیاں نیں۔ ایس لئی ایہدے تصور وچ رہناں انسانی تجربے وچ اجیہیاں شیواں لیاؤندا اے جنہاں دی ساہنوں لوڑ اے، بھانویں اے گھر ہووے یا کوئی وی دوجی چنگی شے ہووے، کیوں جے سیان دی ایہہ حالت کسے وی غلط سوچ نوں باہر کڈھ دیندی اے، جیویں کہ فانی فیصلے، یا رش نال بھری ہوئی صورت حال، چنگی تھاں نہ ہونا، ڈر، بے چینی، گھاٹا وغیرہ، تے ایہناں نوں کھوکھلا تے کھوچل بنا دیندی اے، تے فیرتھاں ہون دیاں حقیقتاں سامنے آؤندیاں نیں تے بوہتے ہم آہنگ تجربیاں نال سامنے آؤندیاں نیں۔ ٹھیک پاسے ول اپنے جال سٹن نال ای تہانوں تہاڈیاں لوڑاں مل دیاں نیں۔ کسے وی انسان دے بنائے ہوئے فیصلے نوں اپنی صلاح یا سوچ منن تو انکار کرو۔

ایہہ جان لو پئی ساریاں سوچاں قدرتی سیان توں آؤندیاں نیں، تے تھاں وغیرہ بارے ساریاں سچیاں سوچاں بریاں سوچاں نوں مکا دیندیاں نی، تے اوہناں دے اثر وی اوہناں دے نال ای ٹر جاندے نیں۔ ایہہ تہاڈے لئی ٹھیک اے پئی تسی اپنے ورگے لوکاں نال ای رہو، تے تہاڈے پورے دل نال اوہدے اتے بھروسہ کرن دے نال ای نویں راہ کھلے گی۔ یاد رکھو، ’’سیان وچ حدو ں بغیر وسائل ہندے نیں،‘‘ ایس لئی اپنے آپ نوں کسے طراں وی حد وچ نہ رکھو۔ بد خواہی دے قانون نال بنی کوئی بد چلنی نئیں اے جیہڑے کسے وی حالت وچ یا صورت وچ کم کررہی ہووے جیہڑا ہنے تے ایتھے تہاڈے لئی رب دے منصوبے دے پورے تے کامل اظہار لئی فوراً رکاوٹ یا اوکھیائی دی وجہ بنے۔