ساڈی آزادی دی تاریخ |

ساڈی آزادی دی تاریخ


23 فروری 1987ء وچ نیو جیرسی دی وڈھی عدالت نے فیصلہ دتا پئی پلین فیلڈ چرچ ’’کرسچن سائنس‘‘دا ناں ورتن دا قانونی حقدار اے۔ ایس تاریخی فیصلے نے بارہ وریاں دی ایس لڑائی نوں مکا دتا جیہڑی ساڈے چرچ دے خلاف کرسچن سائنس دے بورڈ آف ڈائریکٹرز نے چھیڑی سی۔ ایس فیصلے پاروں ساڈے چرچ نوں پلین فیلڈ کرسچن سائنس چرچ، آزاد دا ناں مل گیا۔

پلین فیلڈ چرچ نوں ڈراؤن دی شروعات 1975ء وچ ہوئی جدوں کرسچ سائنس دے بورڈ آف ڈائریکٹرز نے، برانچ دے معاملیاں وچ بورڈ آف ڈائریکٹرز دی شمولیت دے وتیرے پچھے ٹردیا ں ہوئے، ایہہ مانگ رکھی پئی پلین فیلڈ اپنے عزت دار بورڈ آف ٹرسٹیز دی تھاں نویں بورڈ نوں لے کے آن جیہڑے بوسٹن دے ڈائریکٹرز دی تابعداری دا حلف چکن دی تانگ وچ ہوون۔ ساڈے چرچ دے اندر دے معاملیاں وچ ایس غلط شمولیت دا چوکھا جواب دیندیاں ہوئے، سارے رکناں نے ایس مانگ نوں نہ منیا، تے ایس گل ول اشارہ دتا پئی اوہ ڈائریکٹرز تے آپ اپنے سائیں دے مینوئیل، خاص کر کے آرٹیکل23، سیکشن 1تے10 ، تے آرٹیک 11، سیکشن 13 دی خلاف ورزی کردے رہئے سی۔

ڈائریکٹراں دی مانگ اْتے پلین فیلڈ چرچ دی انکاری، ساڈے چرچ نوں 16جون 1977ء دے رسالے والی فہرست وچوں باہر کڈھن دی وجہ بنیا۔ اوسے ویلے ساہنوں ڈائریکٹراں ولوں دسیا گیا پئی اسی ہن ہور ’’کرسچن سائنس‘‘ دا ناں کسے طراں وی ورتن دے حقدار نئیں رہئے۔

جدوں ساڈے چرچ نے ’’انڈیپینڈنٹ کرسچن سائنس چرچ‘‘ ناں رکھیا تے ایہدے تن ورھیاں بعد، 1983ء وچ ڈائریکٹرز ساہنوں عدالت وچ لے گئے تے ساڈے چرچ دی پچھان لئی ’’کرسچن سائنس‘‘ والے لفظاں نوں ورتن تے پابندی لاندیاں ہوئے حکم امتناعی لے لیا۔ فیر چرچ نے ’’پلین فیلڈ کمیونٹی چرچ، کرسچن سائنس دی مشق کرن والا آزاد چرچ‘‘ ناں رکھ لیا تے نیو جیرسی وچ اپیلاں والی عدالت وچ اپنی درخواست دے دتی، جنہے ایس حکم امتناعی نوں مکا دتا تے ایہہ حکم دتا پئی، ’’کرسچن سائنس‘‘ عام لفظ نیں تے خاص کر کے بورڈ آف ڈائریکٹرز دااپنا کاروباری نشان نئیں اے۔ ایہہ فیصلہ نیو جرسی دی وڈھی عدالت ولوں بھارے اکٹھ نال سنایا گیا۔ 268,000 ڈالراں د ا ساڈا پورا قانونی خرچہ چاروں پاسیوں ساڈے رکناں تے حمایتیاں نے کیتا۔

بورڈ آف ڈائریکٹرز کول 90 دناں دا ویلہ سی پئی اوہ اپنی درخواست امریکہ دی عدالت وچ جمع کروا سکدے سی۔ 90دناں توں بوہتے لنگ گئے نیں تے ایس لئی، ہن اوہ امریکہ دی وڈھی عدالت وچ اپنے ایس حق نوں گنوا بیٹھے نیں۔ ہن اسی جتھے ساڈی مرضی ہووے ’’کرسچن سائنس‘‘ دے لفظاں نوں ورتن دا حق جت گئے آں۔ قانون دا ایہہ فیصلہ اصل وچ تاریخی اے۔ ہن ایہہ ساڈے چرچ نوں ’’کرسچن سائنس‘‘ والا ناں ورتن لئی آزاد کردا اے تے چرچ دی کسے وی شاخ لئی، استغاثہ دے ڈر توں بغیر، خود مختیاری تے اوس آزاد کم نوں کرن دا حق رکھن لئی بوہے کھولدا اے جیدے ضمانت مسز ایڈی نے اپنے 88ویں مینوئیل وچ دتی اے، جیدہ اخیری شمارہ ساڈے کرسچن سائنس دے چرچاں دیاں حکومتاں لئی ساڈی سائیں نے آپ جاری کیتا ۔

آزاد ہوون توں لے کے ہن تیکر پلین فیلڈ چرچ نے بوہت ودھیا ترقی تے خوشحالی دا تجربہ کیتااے۔ ساڈے کول بوہت وڈھی، وسیع رکنیت اے، جیہدے وچ ملک دے باہروں تے اندروں بوہت زیادہ رکن شامل نیں۔پلین فیلڈ چرچ دا خاصا شفا اے، تے شفا دا انوکھا کم ایتھے کئی ورھیاں روں چل رہیا اے۔ جیہڑے لوک سنن دی تانگ رکھدے نیں اوہناں لئی ساڈی سیوا آن لائن دستیاب اے، جیہڑی براہ راست وی اے تے ریکارڈ کیتی ہوئی وی اے۔ ساڈی سیوا توں محسوس ہوون والے خوشی تے پیار دے ماحول بارے زائرین اپنی رائے دیندے نیں۔

1979ء وچ ساڈے چرچ نے اپنے درسی وعظ لکھناں شروع کیتے، تے 1980ء وچ اسی اپنا آزاد تین مہینیاں والا رسالہ شائع کرنا شروع کیتاجیہدی نیوں پوری طراں بائبل تے میری بیکر ایڈی دی لکھی ہوئی کتاب ، سائنس تے صحت ،اتے سی۔ ایہہ سادہ شفا والے سبق سبسکرائبراں دی ایک لمبی ساری فہرست نوں دتے جاندے نیں، جنہاں وچوں کئی ساہنوں ایہناں سبقاں لئی اپنی شکرگزاری بارے لکھدے رہندے نیں۔

مئی 1986ء وچ اسی اپنے چرچ دا اک رسالہ ’’شفادے وچار‘‘ دے ناں توں شائع کرنا شروع کیتا۔ ہنے ہنے، اسی ایس رسالے دا ناں ’’محبت آزاد کرن والی اے‘‘ رکھنا ٹھیک سمجھیا اے جیہدے وچ وچالی تنظیم ولوں کرسچن سائنس توں نکلن والیاں غلط فہمیاں دور کرن اتے زور دتا گیا اے۔ ساہنوں پوری دنیا وچوں اوہناں لوکاں دے پرجوش شکریے مل رہئے نیں جیہڑے کرسچن سائنس دے خالص تے شفا والے ادب دی تانگ رکھدے نیں۔

تحریک وچ شامل کجھ پہلے کارکناں ولوں کرسچن سائنس بارے لکھیاں ہوئیاں بوہت ساریاں چنگیاں تحریراں ساڈے چرچ نے شائع کیتیاں نیں۔ ایہناں دی رکھوالی تے ایہناں نوں شائع کرن دا کم ساڈے ضروری کماں وچوں اک اے۔ 

2008ء وچ ہربرٹ ڈبلیو یوسٹیس ٹرسٹ نے ساڈے چرچ نوں مسٹر یوسٹیس دی زبردست کتاب ’’کرسچن سائنس ایہدے صاف تے اصل تعلیم تے پوری تحریر‘‘ دے وچالی سپلائیرز دے طور تے ذمہ داری دینا ٹھیک سمجھیا۔ ایہہ ساڈے چرچ دی ساکھ تے مضبوطی لئی اعتماد دا بوہت ودھیا ووٹ ثابت ہویا۔ مسٹر یوسٹیس کرسچن سائنس دے وڈھے کارکناں وچوں اک سی۔ اوہناں نوں مسز ایڈی ولوں پبلشنگ سوسائٹی دے ٹرسٹی دے طور تے رکھیا گیا ، تے 40 ورھیاں تیکر آزاد مسیحی سائنسدان دے طور تے کرسچن سائنس دی تعلیم دتی۔