مضمون۔ اصلیت

1۔ اسمان رب دا جلال ظاہر کردا اے تے ہوا اوہدی دستکاری وکھاؤندی اے۔

7۔ رب دی شریعت کامل اے۔ اوہ جند نوں بحال کر دی اے۔رب دی گواہی سچی اے۔ نادان نوں سیان دیندی اے۔

8۔ رب دے قانون راست نیں۔ اوہ دل نوں سکون دیندے نیں۔ رب دا حکم بے عیب اے۔ اوہ اکھیاں نوں روشن کردا اے۔

9۔ رب دا ڈر پاک اے۔ اوہ ہمیش تیکر رہندا اے۔ رب دے حْکم سچے نیں تے بالکل راست نیں۔

10۔ اوہ سونے توں تے بوہت کْندن توں وی زیادہ پسند کیتے جان والے نیں۔ اوہ شہد توں بلکہ شہد دے چھتیاں دے ٹپکیاں توں وی مٹھے نیں۔ 

14۔ میرے منہ دا کلام تے میرے دل دا خیال تیرے سامنے قبول ہووے۔ اے رب! اے میرے چٹان تے میرے فدیہ دین والے۔

1۔ زبور16: 1، 2(توں :) ، 5، 8، 10، 11 آیتاں

1۔اے خدا! میری راکھی کر کیوں جے میں تیتھوں ای پناہ لیناں واں۔

2۔میں رب نوں آکھیا اے پئی توں ای رب ایں۔ تیرے بغیر میری چنگیائی نئیں۔

5۔رب ای میری میراث تے میرے پیالے دا حصہ اے۔ تْوں میرے بخرے دا راکھا ایں۔ 

8۔میں رب نوں ہمیشہ اپنے سامنے رکھیا اے۔ ایس لئی پئی اوہ میرے سجے ہتھ اے تے مینوں جنبش نئیں ہووے گی۔ 

10۔کیوں جے تْوں نہ میری جند نوں پاتال وچ رہن دیویں گا تے نہ اپنے مقدس نوں سڑن دیویں گا۔

11۔تْوں مینوں حیاتی دی راہ وکھانویں گا۔ تیرے سامنے کامل شادمانی اے۔ تیرے سجے ہتھ وچ ہمیشہ دی خوشی اے۔

2۔ یسعیاہ 43باب 1توں5، 7 آیتاں

1۔تے ہْن اے یعقوب! رب جنہے تینوں پیدا کیتا اے تے جنہے اے اسرائیل تینوں بنایا اے ایہہ آکھدا اے پئی ڈر نہ کیوں جے مَیں تیرا فدیہ دِتا اے۔ مَیں تیرا ناں لے کے تینوں بلایا اے تْوں میرا ایں۔

2۔جدوں تْوں سیلاب وچوں ننگیں تے میں تیرے نال ہوواں گا تے جدوں تْوں ندیاں وچوں ننگیں تے اوہ تینوں نہ ڈباؤن گئیاں۔ جدوں تْوں اگ وچ ٹْریں تے تینوں اگ نہ لگے گی تے پانبڑھ تینوں نہ ساڑے گا۔

3۔کیوں جے مَیں تیرا رب اسرائیل دا قدوس تینوں مکتی دین والا آں۔ مَیں تیرے فدیے وچ مصر نوں تے تیرے بدلے کوش تے سبا نوں دے دِتا۔ 

4۔کیوں جے تْوں میری نظر وچ قیمتی تے مکرم ٹھہرئیاں تے مَیں تیرے نال پیار کیتا ایس لئی مَِیں تیرے بدلے لوک تے تیری جند دے بدلے امتاں دے دیواں گا۔

5۔تْوں ڈر نہ کیوں جے مَیں تیرے نال آں۔ مَیں تیری نسل نوں مشرق توں لے آنواں گا تے مغرب توں تینوں فراہم کراں گا۔

7۔ہر اک نوں جیہڑا میرے ناں توں اکھواندا اے تے جنہوں میں اپنے جلال لئی بنایا اے جنہوں مَیں پیدا کیتا اے ہاں جنہوں مَیں ای بنایا اے۔

3۔ دانی ایل 3باب 1 (توں پہلا) ، 8، 9(توں پہلا) ، 12، 14، 15 (جے تسی سجدہ نئیں کروگے) ۔ 18، 21، 24، 25، 27آیتاں

1۔نبو کد نضر نے اک سونے دی مورتی بنوائی جیدی لمبائی سٹھ ہتھ تے چوڑائی چھ ہتھ سی تے اوہنوں دْرا دے میدانی صوبے بابل وچ کھڑا کیتا۔ 

8۔فیر اوس ویلے کجھ کسدیاں نے آکے یہوداہ اْتے الزام لایا۔

9۔اوہناں نے نبو کد نضر بادشاہ نوں آکھیا اے بادشاہ ہمیشہ تیکر جیوندارہ۔ 

12۔ہْن کجھ یہودی نیں جنہاں نوں تْوں بابل دے صوبے دی کارپردازی دا بیڑا دِتا اے یعنی سدرک تے میسک تے عبد نجو۔ اے بادشاہ ایہناں بندَیاں نے تیری عزت نئیں کیتی۔ اوہ تیرے دیوتاواں دی عبادت نئیں کردے تے اوس سونے دی مورتی نوں جنہوں تْوں کھڑا کیتا اے سجدہ نئیں کردے۔ 

14۔نبو کد نضر نے اوہناں نوں آکھیا سدرک تے میسک تے عبد نجو کیہ ایہہ سچی گل اے پئی تسی میرے دیوتاواں دی عبادت نئیں کر دے تے اوس سونے دی مورتی نوں جنہوں میں کھڑا کیتا اے سجدہ نئیں کردے؟

15۔... جے سجدہ نہ کرو گے تے اوسے ویلے ای اگ دی بلدی بھٹی وچ سْٹے جاؤ گے تے کیہڑا دیوتا تہانوں میرے ہتھوں چھْڑاو ے گا؟ 

16۔سدرک تے میسک تے عبد نجو نے بادشاہ اگے آکھیا پئی اے نبو کد نضر ایس گل وچ اسی تینوں جواب دینا ضروری نئیں سمجھدے۔ 

17۔ویکھ ساڈا رب جیہدی اسی عبادت کر دے آں ساہنوں اگ دی بلدی بھٹی وچوں چھْڑان دی قدرت رکھدا اے تے اے بادشاہ اوہ ای ساہنوں تیرے ہتھوں چھْڑاوے گا۔

18۔ہور نئیں تے بادشاہ تینوں ایہہ پتا ہونا چاہیدا اے پئی اسی تیرے دیوتاواں دی عبادت نئیں کراں گے تے اوس سونے دی مورت نوں جنہوں تْوں کھڑا کیتا اے سجدہ نئیں کراں گے۔

21۔فیر ایہہ بندے اوہناں دیاں شلواراں قمیضاں تے سافیاں سمیت بنھے گئے تے اگ دی بلدی بھٹی وچ سْٹ دِتے گئے۔

24۔فیر نبوکد نضر حیران ہو کے کھڑا ہویا تے ارکانِ دولت نال گل کر کے آکھن لگیا پئی کیہ اسی تِن بندیاں نوں بنھوا کے اگ وچ نئیں سی سْٹیا؟ اوہناں جے جواب دِتا پئی بادشاہ نے صحیح آکھیا اے۔

25۔اوہنے آکھیا پئی میں چار بندیاں نوں اگ وچ کھلے پھردا ویکھدا آں تے اوہناں نوں کوئی نقصان نئیں ہوئیا تے چوتھے بندے دی شکل اِلہٰ زادہ ورگی اے۔

27۔فیر ناظماں تے حاکماں تے سرداراں تے بادشاہ دے مشیراں نے اکٹھے ہوکے اوہناں بندیاں نوں ویکھیا پئی اگ نے اوہناں دے جسماں تے کجھ اثر نئیں کیتا تے اوہناں دے سِر دا اک وال وی نئیں سڑیا تے اوہناں دے کپڑیاں وچوں اگ نال سڑن دی بو وی نئیں سی آؤندی۔

4۔ لوقا 17باب 11توں14آیتاں

11۔تے اینج ہوئیا پئی یروشلیم نوں جاندیاں ہوئے اوہ سامریہ تے گلیل وچوں ہْندیاں ہوئے جا رہیا سی۔ 

12۔تے اک پِنڈ وچ وڑھن ویلے اوہنوں دس کوڑھی ملے۔ 

13۔اوہناں نے دور کھڑے ہوکے اْچی آواز نال آکھیا اے یسوع! اے صاحب! ساڈے اْتے رحم کر۔

14۔اوہنے اوہناں نوں ویکھ کے آکھیا جاؤ اپنے آپ نوں کاہن نوں وکھاؤ تے اینج ہوئیا پئی اوہ جاندے جاندے پاک صاف ہو گئے۔

5۔ 1کرنتھیوں 13باب 9، 10آیتاں

9۔کیوں جے ساڈا علم ناقص اے ساڈی نبوت نامکمل۔

10۔پر جدوں کامل آوے گا تے ناقص مک جاووے گا۔

6۔ 1یوحنا 5باب18، 20آیتاں

18۔ اسی جان دے آں پئی جیہڑا رب توں جمیا اے اوہ پاپ نئیں کر دا بلکہ اوہدی راکھی اوہ کردااے جیہڑا رب توں جمیا اے تے اوہ شریر اوہنوں چھو وی نئیں سکدا۔ 

20۔تے ایہہ وی جان دے آں پئی رب دا پْتر آگیا اے تے اوہنے ساہنوں سیان دِتی اے تاں جو اوہنوں جیہڑا اصلی اے جانن تے اسی اوہنوں جیہڑا اصلی اے یعنی اوہدے پْتر یسوع مسیح نوں۔ اصلی رب تے ہمیشہ دی حیاتی ایہہ ای اے۔

7۔ رومیوں 12باب1، 2آیتاں

1۔ایس لئی اے بھراوو! مَیں رب دیاں نعمتاں یاد کرا کے تہاڈے اگے درخواست کردا آں پئی اپنے بدن اجیہی قربانی ہوون لئی پیش کرو جیہڑی زندہ تے پاک تے رب نوں پسند ہووے۔ ایہہ ای تہاڈی صحیح عبادت اے۔

2۔تے ایس جگ دے ہم شکل نہ بنو بلکہ سیان نویں ہو جان نال اپنی صورت بدل دے جاؤ تاں جو رب دی نیک تے پسندیدہ تے کامل مرضی تجربے نال پتا کردے رہوؤ۔ 

8۔ متی 5باب48آیت

45۔ایس لئی چاہیدا اے پئی تْسی کامل بنو جیویں تہاڈا اسمانی پیو کامل اے۔

1۔ 335: 27۔28

اصلیت روحانی، ہم آہنگ، نہ بدلن والی، لافانی ، الٰہی تے ابدی اے۔

2۔ 475:11۔13

انسان روحانی تے کامل اے، تے کیوں جے اوہ روحانی تے کامل اے ایس لئی اوہنوں کرسچن سائنس وچ اینج دا ای سمجھناں چاہیدا اے۔ 

3۔ 256:6۔21

الٰہی سائنس وچ انسان رب دی اصلی شبیہ اے۔ الٰہی فطرت نوں مسیح یسوع وچ بوہت چنگے طریقے نال بیان کیتا گیا اے، جنہے انساناں اْتے رب دی بوہت مناسب عکاسی ظاہر کیتی تے ماڑی سوچ دے نمونے توں وڈھی معیارِ زندگی فراہم کیتی، یعنی اجیہی سوچ جیہڑی انسان دے ڈِگن، بیماری ، پاپ کرن تے مرن نوں ظاہر کردی اے۔ سائنسی ہستی تے الٰہی شفا دی مسیح ورگی سمجھ وچ کامل اصول تے خیال، کامل رب تے کامل انسان، سوچ تے اظہار دی نیو ں دے طور تے شامل ہوندے نیں۔ 

جے انسان کدی کامل سی پر ہْن اپنی کاملیت گوابیٹھا اے تے فیر انسان رب دی شبیہ دا عکس اپنے اندر کدی نئیں رکھدے۔ گواچی ہوئی شبیہ کوئی شبیہ نئیں اے۔ الٰہی عکس وچ اصلی مشابہت کدی نئیں گواچ سکدی۔ ایہنوں سمجھدیاں ہوئے، یسوع نے آکھیا، ’’ایس لئی چاہیدا اے پئی تْسی کامل بنو جیویں تہاڈا اسمانی پیو کامل اے۔‘‘

4۔ 253:32۔8

الٰہی مانگ، ’’چاہیدا اے پئی تْسی کامل بنو‘‘، سائنسی اے، تے کاملیت ول راہ وکھاؤن والے انسان دے پیراں دے نشان ضروری نیں۔ اوہ لوک مضبوط ہْندے نیں جیہڑے دھیان رکھدیاں ہوئے تے دعا کردیاں ہوئے ’’نس دے نیں تے تھک نئیں سکدے۔۔۔ ٹْر دے نیں تے ماندہ نئیں ہو سکدے‘‘، جیہڑے چھیتی نال چنگیائی حاصل کردے نیں تے اپنی ایس حالت نوں برقرار رکھدے نیں، یا ہولی ہولی حاصل کردے تے نہ امیدی نوں نئیں پیدا ہوون دیندے۔ رب کاملیت منگدا اے پر اوس ویلے تیکر نئیں جدوں تیکر روح تے بدن دے وچکائے جنگ نہ لڑی جاوے تے جِتی نہ جاوے۔

5۔ 414:26۔31

ہستی دی اصلیت نوں ذہن وچ رکھو، انسان رب دی شبیہ وانگر اے، جیدے وچ ساری انسانیت پیڑ توں بغیر تے مستقل اے۔ یاد رکھو پئی انسان دی کاملیت اصلی تے نا قابل اعتراض اے، جد کہ ناکاملیت قابل الزام، نقلی تے الٰہی محبت توں پیدا ہوون والی نئیں اے۔

6۔ 275:20۔24

جیویں کہ روحانی سمجھ وچ ظاہر ہوئیا اے الٰہی مابعد الاطبیعیات واضح طور تے وکھاؤندا اے پئی سب کجھ سیان ای اے تے ایہہ سیان رب، قادرِ مطلق، ہمہ جائی، علام الغیوب اے یعنی کہ ساری طاقت والا، ہر تھاں موجود تے ساری سائنس دا مالک اے۔ ایس لئی اصل وچ سارا کجھ سیان دا اظہار اے۔ 

7۔ 337:10۔17

الٰہی سائنس دے مطابق انسان دا درجہ اونج دا ای کامل اے جیہو جئی اوہ سیان اے جیہڑی اوہنوں بناؤندی اے۔

8۔ 353:14(وقت) ۔19

ویلہ ہلے ابدیت، لافانیت تے پوری اصلیت تیکر نئیں اپڑیا۔ ساری اصلیت ابدی اے۔ کاملیت اصلیت نوں سامنے لاؤندی اے۔ کاملیت باہجوں کجھ وی پورے طور تے اصلی نئیں اے۔ جدوں تیکر کاملیت ظاہر نئیں ہْندی تے اصلیت تیکر نئیں اپڑدی ساریاں شیواں غائب ہونیاں جاری رہن گیاں۔

9۔ 478:24۔27

شروع توں اخیر تیکر جو کجھ وی فانی اے اوہ مادی انسان دے یقین نال بنیا اے تے ہور کسے شے نال نئیں۔ بس اوہ ای اصلی اے جیہڑا رب دی عکاسی کردا اے۔

10۔ 130: 32۔5

سچیائی نوں غلطی وانگر عجیب تے غیر فطری نئیں لگنا چاہیدا تے غلطی نوں سچیائی وانگر اصلی نئیں لگنا چاہیدا۔ بیماری نوں تندرستی وانگر وکھالی نئیں دینا چاہیدا۔ سائنس وچ کوئی غلطی نئیں اے، تے رب یعنی ساریاں شیواں دے الٰہی اصول دے نال ہم آہنگ ہوون لئی ساڈیاں حیاتیاں اتے اصلیت دی حکمرانی ہونی چاہیدی اے۔

11۔ 475:28۔5

انسان پاپ، بیماری تے موت دے لائق نئیں۔ اصلی انسان پاکیزگی توں وکھرا نئیں ہو سکدا تے نہ ای رب ، جیدے توں انسان نشوو نما پاؤندا اے، پاپ دے خلاف قوت یا آزادی پیدا کر سکدا اے۔ اک بشری پاپی رب دا بندہ نئیں اے۔ بشر لافانیاں دے فریب نیں۔ اوہ بدکرداراں یا بداں دے بال نیں جیدے توں ایہہ ظاہر ہْندا اے پئی انسان مٹی توں شروع ہوئیا یا مادی ایمبریو دے طور تے پیدا ہوئیا اے۔ 

12۔ 258:25۔30

بشر نوں روحانی انسان دی تے اوہدے خیالاں دی لا محدود وسعت دی بوہت نامکمل سمجھ سے۔ ابدی حیاتی اوہدے نال تعلق رکھدی اے۔ رب دی حکمرانی ہیٹھاں ابدی سائنس وچ کدی نہ پیدا ہوون تے کدی نہ مرن نال انسان لئی اپنے اْچے مقام توں ہیٹھاں ڈِگناں ناممکن سی۔

13۔ 297:32(بیماری) ۔ 4

بیماری، پاپ تے موت انسانی نتیجیاں دیاں وہم والیاں اصلیتاں نیں۔ حیاتی ، سچیائی تے پیار الٰہی سائنس دیاں اصلیتاں نیں۔ اوہناں دی شروعات ایمان وچ ہْندی اے تے ایہہ روحانی سمجھ وچ پورے مدار دے نال چمکدے نیں۔

14۔ 393:29۔4

انسان کدی بیمار نئیں ہْندا، کیوں جے سیان کدی بیمار نئیں ہْندی تے نہ ای مادا۔ آزماؤن والا تے آزمایا جان والا ، پاپ تے پاپی ، بیماری تے اوہدی وجہ دونویں جھوٹا ایمان نیں۔ بیماری وچ پر سکون رہنا چنگا اے؛ پر امید ہونا چنگا اے؛ پر ایہہ سمجھناں پئی بیماری اصلی نئیں اے تے ایہہ پئی سچیائی ایہدی نظر آؤن والی اصلیت نوں برباد کر سکدی اے سب توں بوہتا چنگا اے کیوں جے ایہہ سمجھ عالمگیر تے کامل علاج اے۔

15۔ 161:3۔10

تسی آکھدے او، ’’مَیں اپنی انگلی ساڑ لئی اے‘‘۔ ایہہ اک موقع دا بیان اے، تہاڈی سوچ توں وی بوہتا موقع دا بیان، کیوں جے مادی نئیں بلکہ بشری سیان ایہہ ساڑدی اے۔ پاک الہام نے اجیہیاں ذہنی حالتاں پیدا کیتیاں نیں جیہڑیاں پانبھڑاں دے ردِعمل نوں مْکان دے قابل نیں، جیویں کہ بائبل وچ تِن عبرانی قیدیاں دا معاملہ سی، اوہناں نوں بابلیاں دی بھٹی وچ سْٹیا گیا سی، جد کہ اک مخالف ذہنی حالت اچانک سْلگن نوں پیدا کردی اے۔

16۔ 260:7۔12

بشری خیالاں یعنی غلط تصوراں نوں اوہناں تصوراں دی راہ سِدھی کرنی چاہیدی اے جیہڑے کامل تے ابدی نیں۔ کئی نسلاں توں انسانی عقیدے الٰہی تصوراں نوں حاصل کرن گے تے رب دیاں بنایاں شیواں دا لافانی تے کامل نمونہ اخیریں صرف ہستی دے اصلی تصور دے طور تے وکھالی دیوے گا۔

17۔ 470: 11۔16 (تاپہلا) ، 32۔5

الٰہی سائنس ہیٹھاں دِتی ہوئی آپ سامنے آؤن والی صلاح دے راہیں ایس خیالی بیان نوں واضح کردی اے پئی سیان اک اے: جے رب یا نیکی اصلی اے تے بریائی، یعنی رب دی غیر مشابہت وی نقلی اے۔ تے بریائی صرف نقلی نوں اصلی دا روپ دین نال ای اصلی وکھالی دے سکدی اے۔

سائنس وچ رب تے انسان، الٰہی اصول تے خیال دے تعلق لازوال نیں، تے سائنس نہ بدلن والی رہن بارے بھْل چْک نئیں جان دی تے نہ ای ایہدی ابدی تاریخ توں ہم آہنگی ول پرت کے آؤنا جان دی اے، پر اپنے وچ الٰہی حْکم یا روحانی قانون ضرور رکھدی اے جیدے وچ رب جو کجھ بناؤندا اے کامل تے ابدی نیں۔